ဘေယန်မြူးနစ် ကတော့ မနေ့ညက ကစားခဲ့တဲ့ ချန်ပီယံလိဂ် ပွဲစဉ်မှာ ဒိန်းမတ် ကလပ် ကိုပေဟေဂင်ကို အဝေးကွင်းမှာ ခက်ခက်ခဲခဲ ကန်ပြီး အနိုင်ရသွားခဲ့ပါတယ်။
အိမ်ရှင် အသင်းရဲ့ ဦးဆောင်ခြင်း ခံခဲ့ရပေမယ့် မူဆီအာလာနဲ့ တဲလ် တို့ရဲ့ ချေပဂိုးတွေ ကယ်လို့သာ ချန်ပီယံလိဂ် နိုင်ပွဲ ဆက်ခဲ့တာ ဖြစ်ပါတယ်။ ဒါပေမယ့် ဘေယန်မြူးနစ်ရဲ့ ချန်ပီယံလိဂ် နိုင်ပွဲထက် ပိုပြီး စိတ်ဝင်စားဖို့ ကောင်းနေတဲ့ ကိစ္စ တစ်ခု ရှိနေပါတယ်။ ဒါကတော့ ဂိုးသမားကြီး မန်ဝဲလ် နော်အာ တစ်ယောက် မလှိမ့်တစ်ပတ် အလုပ်ခံရတဲ့ ကိစ္စပါ။ ဘယ်သူက လုပ်တာလဲ ဆိုရင်တော့ အက်ပလီကေးရှင်း တစ်ခုက နော်အာရဲ့ ဗီဒီယိုကို AI နဲ့ ဖန်တီးပြီး ဒီအက်ပလီကေးရှင်းကို နော်အာ ကိုယ်တိုင် မိတ်ဆက်ပေးနေသယောင် ဖန်တီးခဲ့တာ ဖြစ်ပါတယ်။
ဒီနောက်ပိုင်းကာလမှာ Artificial Intelligence (AI)ရဲ့ လုပ်နိုင်စွမ်းက တော်တော်လေး တိုးတက်လာနေပြီး နယ်ပယ်အစုံမှာ တော်တော်လေးလည်း အသုံးတည့်လာတာ တွေ့ရပါတယ်။ ဒါပေမယ့် အရာတစ်ခုက ရေပန်းစားလာပြီ ဆိုတာနဲ့ သူ့မှာ Pros and Cons လို့ခေါ်တဲ့ ကောင်းကျိုးရှိသလို ဆိုးကျိုးလည်း ရှိပါတယ်။
အခု နော်အာ ကြုံတွေ့နေရတာက ဆိုးကျိုး ဖြစ်ပါတယ်။ ဒီအက်ပလီကေးရှင်း ဆိုတာ ကလည်း Scam တစ်ခုပါ။ လူတွေဆီက အထူးသဖြင့် အသုံးပြုသူတွေဆီက ငွေကြေး လိမ်လည်ဖို့ ဖန်တီးထားတဲ့ အရာ တစ်ခု ဖြစ်ပါတယ်။ ဗီဒီယိုထဲမှာ နော်အာက “ခင်ဗျား တို့ကို ကျွန်တော် ယူရိုတစ်ထောင်နဲ့ အထက်ကို အချိန်တို အတွင်း ဘယ်လိုမျိုး ရှာနိုင်ခဲ့လဲ ပြောပြပါမယ်” ဆိုပြီး စထားပါတယ်။
ဒီမှာကတည်းက လွဲသွားပါပြီ။ လုပ်တဲ့ ကောင်တွေကလည်း လုပ်ပဲ လုပ်တတ်လွန်းပါတယ်။ နော်အာ အတွက်တော့ ယူရို တစ်ထောင်ဆိုတာ ဘာမှမဟုတ်တဲ့ ပမာဏပါ။ ကမ္ဘာကျော် ဘောလုံးသမား တစ်ယောက် အတွက်၊ စက္ကန့် အလိုက် ငွေဝင်နေတဲ့သူတွေ အတွက် ဒီလိုမျိုး အက်ပလီကေးရှင်းမှာ ယူရို တစ်ထောင်ကို ဘယ်လို ယူရမလဲ ဆိုတာ ကလည်း ဟာသ တစ်ခုလိုပါပဲ။
နော်အာ ကိုယ်တိုင် ရိုက်ထားတဲ့ ဒီဗီဒီယိုမှာ နော်အာရဲ့ ပါးစပ် အလှုပ်၊ အသံနဲ့အတူ ကတ်ဒ်တွေကိုပါ စနစ်တကျဖြစ်အောက် ဖြတ်ထား၊ ဆက်ထားပြီး တော်ရုံလူတွေ အတွက်တော့ ဒါက နော်အာ ကိုယ်တိုင် အမှန်တကယ် ရိုက်ကူး ကြော်ငြာပေးနေတဲ့ ဗီဒီယို အစစ်ပဲလို့ ထင်ရမှာပါ။
ဒီဗီဒီယိုထဲမှာ နော်အာက သူ့ရဲ့ ကလပ် ဘွန်ဒက်စ်လီဂါ ဘီလူးကြီး ဘေယန်မြူးနစ်ရဲ့ ဂျာစီကိုတောင် ဝတ်ဆင်ထားလိုက်ပါသေးတယ်။ အခုတော့ နော်အာရဲ့ ရှေ့နေတွေက ဒီအက်ပလီကေးရှင်းကို တရားစွဲဖို့ စဉ်းစားနေပါပြီ။
အရင်ဆုံး ဒီအက်ပလီကေးရှင်းကို ခြေရာခံရမှာ ဖြစ်ပြီး အဲ့ဒီနောက်မှသာ ဖမ်းမိဖို့ ဆက်လုပ်ရမှာပါ။ နော်အာ တစ်ယောက် ChatGPT တို့၊ ဘာတို့ကို စသုံးဖူးပြီလားတော့ မပြောတတ်ပါဘူး။ ဒါပေမယ့် AI ရဲ့ ဆိုးကျိုး ကိုတော့ အကြီးအကျယ် ခံစားလိုက်ရပါပြီ။
ဒီဗီဒီယို ကလည်း နော်အာရဲ့ ရှိပြီးသား ဗီဒီယို တစ်ခုကို ယူ၊ ပြီးမှ အသံတွေနဲ့ ဘာတွေကို AI နဲ့ ကောက်ပြောင်းပြီး ဖန်တီးထားတာမျိုးပါ။ ဘာပဲဖြစ်ဖြစ် ကမ္ဘာကျော် ကစားသမားတွေ အတွက် ဒီဖြစ်ရပ်က သတိထားစရာ ဖြစ်ပြီး ရှေ့ကနေ ဒါမျိုးလုပ်ပြသွားတဲ့သူ ရှိတယ် ဆိုတော့လည်း နောက်လူတွေက ကမ္ဘာကျော် ကစားသမားတွေကို အသုံးချပြီး ဒီလိုမျိုး Scam တွေကို မဖန်တီးဘူးလို့ မပြောနိုင်ပါဘူး။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.