ပေါ်တူဂီ တိုက်စစ်မှူး ခရစ္စတီယာနို ရော်နယ်ဒိုကတော့ သူ့ရဲ့ ကစားသမားဘ၀ နောက်ဆုံးသော ယူရိုခြေစစ်ပွဲ အဖြစ် ညကကစားခဲ့တဲ့ အိုက်စလန်နဲ့ ပွဲကို ပါဝင်ကစားခဲ့ပါတယ်။ ဘာလို့ နောက်ဆုံး ခြေစစ်ပွဲလို့ ပြောရလဲဆိုရင် ယူရို ၂၀၂၈ အတွက် ခြေစစ်ပွဲတွေကို ၂၀၂၇ မှ ကျင်းပမှာပါ။ အဲဒီအချိန်ဆိုရင် ရော်နယ်ဒိုက အသက် ၄၀ ကျော်ပြီး ကစားသမားဘ၀ ကပါ အနားယူနေလောက်ပါပြီ။ သူ မကစားပေးနိုင်တော့ပါဘူး။ ဒါကြောင့် ညက အိုက်စလန်နဲ့ ယူရို ၂၀၂၄ ခြေစစ်ပွဲဟာ သူ့အတွက် နောက်ဆုံးသော ယူရိုခြေစစ်ပွဲ ဖြစ်လာခဲ့တာပါ။ ဒီပွဲမှာ သူ ဝင်ကစားပြီး ဂိုးသွင်းယူကာ နှုတ်ဆက်နိုင်မယ်လို့ ထင်ခဲ့ပေမယ့် ရော်နယ်ဒို ဂိုးမသွင်းနိုင်ခဲ့ပါဘူး။
ပေါ်တူဂီက ဘရူနို ဖာနန်ဒက်စ်၊ ဟော့တာ တို့ရဲ့ ဂိုးတွေနဲ့ အနိုင်ရခဲ့ပြီး ယူရို ၂၀၂၄ ခြေစစ်ပွဲမှာ ၁၀ ပွဲစလုံး အနိုင်ရကာ ခြေစစ်ပွဲ အောင်မြင်ခဲ့ပါတယ်။ ရော်နယ်ဒိုက ၁၀ ဂိုး အထိ သွင်းယူခဲ့ပြီး သူ့အသက်အရွယ်နဲ့ ဒီလောက်ထိ လုပ်ပြနိုင်တာကိုက အံ့အားသင့်စရာပါ။ ဒီပွဲ မတိုင်ခင်မှာ အသင်းဟောင်း စပို့တင်းလစ္စဘွန်းက သူ့ကို ဂုဏ်ပြုပြီး ထုတ်လုပ်ထားတဲ့ အသင်းရဲ့ တတိယမြောက် ဂျာစီကို လက်ဆောင် အဖြစ် ပေးအပ်ကာ ဂုဏ်ပြုခဲ့ပါသေးတယ်။ လာမယ့်လ အနည်းငယ် အတွင်းမှာ အသက် ၃၉ နှစ်ပြည့််တော့မယ့် ရော်နယ်ဒိုဟာ ယူရို ၂၀၂၄ ပြိုင်ပွဲကြီး ကိုတော့ ဝင်ကစားမှာ သေချာပါတယ်။
ညက ပွဲကို ပရိသတ် တော်တော်များများ စောင့်ကြည့် အားပေးခဲ့ပြီး ရော်နယ်ဒိုရဲ့ နောက်ဆုံး ခြေစစ်ပွဲ ဆိုတဲ့ အသိစိတ်နဲ့ပါ။ ဂန္ထဝင်ကစားသမား တစ်ဦးရဲ့ ဒီပွဲဟာ တချိန်မှာ အမှတ်တရ ဖြစ်စရာ၊ ပြန်ပြောင်းပြ ပြောချင်စရာ ဖြစ်လာမှာ သေချာပါတယ်။ သူသာ ဂိုးရခဲ့ရင် ပိုပြီး ပြောစမှတ်တွင်ခဲ့မှာ ဆိုပေမယ့် ရော်နယ်ဒို မလုပ်နိုင်ခဲ့တာတော့ နှမျောစရာပါပဲ။ အခုတော့ သူနဲ့ ယူရို ခြေစစ်ပွဲတွေ ကြားမှာ ကန့်လန်ကာချလိုက်ပါပြီ။ ယူရို ၂၀၂၄ ပြီးရင်လည်း ပြိုင်ပွဲကြီးတွေကို သူ ကျောခိုင်းပြီဆိုတာကို မြင်တွေ့ရဦးမှာပါ။ ကမ္ဘာ့ ဘောလုံးသမိုင်းထဲက အကောင်းဆုံး ကစားသမား တစ်ဦးကို ကျနော်တို့ နှုတ်ဆက်ရပါဦးမယ်။
အဲဒါကြောင့်လည်း အခုချိန်မှာ ရော်နယ်ဒိုရဲ့ ပွဲတွေကို ၀အောင် ကြည့်ထားကြ ဆိုပြီး တိုက်တွန်းနေကြတာပါ။ ပွဲက အရေးပါသည် ဖြစ်စေ၊ မပါသည် ဖြစ်စေ ရော်နယ်ဒိုကြောင့် အသက်ဝင်၊ စိတ်ဝင်စားစရာ ကောင်းနေခဲ့တာပါ။ ဒါကိုကပဲ သူ့ရဲ့ အရှိန်အဝါ ဖြစ်ပါတယ်။ ရော်နယ်ဒိုက ပြိုင်ပွဲတွေကို တစ်ခုပြီး တစ်ခု နှုတ်ဆက်ကာ သူ့ရဲ့ ကစားသမားဘ၀ကို အဆုံးသတ်မှာပါ။ အခု ခြေစစ်ပွဲ၊ ပြီးရင် ယူရို ပြိုင်ပွဲကြီး အဲဒီနောက် ပြိုင်ပွဲ တစ်ခုပြီး တစ်ခုကို စွန့်ခွာကာ မြက်ခင်းစိမ်းတွေကို အပြီးတိုင် နှုတ်ဆက်ပါလိမ့်မယ်။ ဒါတွေက မလွဲမသွေ ကြုံတွေ့ရမှာပါ။
ဒီလိုမျိုးကို မမြင်ချင်လည်း မြင်တွေ့ရဦးမှာပါပဲ။ အခုချိန်ထိတော့ သူက အားလုံးကို အံ့အားသင့်စေမယ့် ကြံ့ခိုင်မှု၊ ခြေစွမ်း၊ သွင်းဂိုးတွေနဲ့ ဖျော်ဖြေနေတုန်းပါပဲ။ သိပ်မကျန်တော့တဲ့ အချိန်ကာလတွေမှာ သူကစားတာတွေ ကိုပဲ ဂရုတစိုက် ကြည့်ဖို့ပဲ ရှိပါတယ်။ နောက်ဆိုရင် သူကစားတာတွေကို အဟောင်းတွေပဲ မြင်ရတော့မှာပါ။ ဒီလိုနဲ့ပဲ ကျနော်တို့ ချစ်တဲ့ ကစားသမားကြီးတွေ တစ်ဦးပြီး တစ်ဦး နှုတ်ဆက် ထွက်ခွာကြ၊ အနားယူကြနေတာပါ။ ရော်နယ်ဒို ပြီးရင်လည်း လီယွန်နယ် မက်ဆီ အလှည့်က လာပါဦးမယ်။ ဘောလုံးပရိသတ်တွေ အတွက် တကယ်ကို စိတ်မကောင်းစရာ အခိုက်အတန့်တွေ ဖြစ်လာဦးမှာတော့ သေချာပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.
