၂၀၂၆ ကမ္ဘာ့ဖလား ကြိုတင် သုံးသပ်ချက် – စပိန်

ဥရောပ ချန်ပီယံ စပိန် အသင်းဟာ သူတို့ရဲ့ ဒုတိယမြောက် ကမ္ဘာ့ဖလားကြီးကို ကိုင်မြှောက်နိုင်ဖို့ အတွက် လူကြိုက် အများဆုံး အသင်း ဖြစ်နေပါတယ်။

၂၀၁၀ ပြည့်နှစ်က ဘောလုံးပေးပို့မှု အနုပညာ (တီကီ-တာကာ) နဲ့ အထွပ်အထိပ် ရောက်ရှိခဲ့ပြီး နောက်ပိုင်း စပိန်အသင်းရဲ့ ကမ္ဘာ့ဖလား ဖြတ်သန်းမှုတွေဟာ စိတ်ပျက်စရာ ကပ်ဘေး တစ်ခုနဲ့ အတူ ခြေစွမ်းမပြနိုင်ခဲ့တဲ့ ပွဲစဉ်တွေနဲ့ပဲ ပြည့်နှက်နေခဲ့ပါတယ်။ ဒါပေမယ့် လာမယ့် မြောက်အမေရိက ကမ္ဘာ့ဖလား မှာတော့ လာရိုဟာတို့ အပေါ် ထားရှိတဲ့ မျှော်လင့်ချက်တွေက အင်မတန် မြင့်မားနေပါတယ်။

စပိန် အသင်းဟာ ၂၀၂၂ ခုနှစ်မှာ နည်းပြ လူးဝစ် အန်နရီကေး နှုတ်ထွက်သွားပြီး နောက်ပိုင်း အသင်းကို အံ့ဩစရာကောင်းအောင် ပြန်လည် တည်ဆောက်နိုင်ခဲ့ပြီး ယူရို ၂၀၂၄ ပြိုင်ပွဲ မှာတော့ ဘယ်သူကမှ တားဆီးလို့ မရတဲ့ အင်အားစု တစ်ခု အဖြစ် ပြန်လည် ပေါ်ထွက်လာခဲ့ပါတယ်။ ဂျာမနီမြေမှာ သူတို့ဟာ အကောင်းဆုံး ခြေစွမ်းပြခဲ့ပြီး တောင်ပံတွေရဲ့ ထိုးဖောက်မှု အရှိန်အဟုန်အသစ်နဲ့ အတူ တီကီ-တာကာ ကစားဟန်ကို အသက်သွင်းကာ ထိုက်ထိုက်တန်တန်ပဲ ဥရောပ ချန်ပီယံ ဖြစ်ခဲ့ပါတယ်။

ယူရိုပြိုင်ပွဲမှာ အောင်မြင်ပြီး နောက်ပိုင်းမှာလည်း အရှိန်အဟုန် လျော့ကျသွားမယ့် အရိပ်အမြွက်မျိုး မပြသေးဘဲ၊ အခုမျိုးဆက်သစ်ဟာ ၂၀၀၈ မှ ၂၀၁၂ အထိ စပိန် အသင်း ကမ္ဘာ့ဘောလုံးလောကကို လွှမ်းမိုးခဲ့တဲ့ ရွှေရောင်မျိုးဆက်မျိုးကို တစ်ကျော့ပြန် ပုံဖော်နိုင်မလား ဆိုတာ အားလုံးက စိတ်ဝင်တစား စောင့်ကြည့်နေကြပါတယ်။

 

ကမ္ဘာ့ဖလားဆီ ဖြတ်သန်းခဲ့ရတဲ့ လမ်းခရီး

• ခြေစစ်ပွဲမှတ်တမ်း – ၅ ပွဲနိုင်၊ ဝ ပွဲရှုံး၊ ၁ ပွဲသရေ
• သွင်းဂိုး – ၂၁/ ပေးဂိုး – ၂ ဂိုး
• ဂိုးသွင်း အများဆုံး ကစားသမားများ – မီခဲလ် မာရင်နို၊ မီခဲလ် အိုယာဇာဘယ် (၆ ဂိုးစီ)
• ဂိုးဖန်တီးမှု အများဆုံး ကစားသမား: မီခဲလ် အိုယာဇာဘယ် (၄ ကြိမ်)

စပိန် အသင်းဟာ ခြေစစ်ပွဲ ဒုတိယမြောက် ပွဲစဉ်မှာတင် အရည်အချင်း ရှိတဲ့ တူရကီ အသင်းကို သူတို့မြေမှာ ၆-၀ နဲ့ အပြတ်အသတ် အနိုင်ယူပြီး အရှိန်အဟုန် ကောင်းကောင်းနဲ့ စတင်ခဲ့ပါတယ်။ ပြီးခဲ့တဲ့ နိုဝင်ဘာလ မတိုင်ခင်ကတည်းက စပိန် အသင်းဟာ တစ်ဂိုးမှ မပေးရဘဲ ရာနှုန်းပြည့် နိုင်ပွဲ မှတ်တမ်းနဲ့ အတူ ကမ္ဘာ့ဖလား ခြေစစ်ပွဲ အောင်မြင်ခဲ့တာ ဖြစ်ပါတယ်။ အဲဒီနောက် တူရကီ အသင်းနဲ့ အိမ်ကွင်းမှာ ၂-၂ နဲ့ သရေကျခဲ့တဲ့ တစ်ပွဲတည်းသာ အနည်းငယ် လိုအပ်ချက် ရှိခဲ့ပေမယ့် ကြီးမားတဲ့ ပြဿနာတော့ မဟုတ်ခဲ့ပါဘူး။

 

နည်းပြချုပ် လူးဝစ္စ ဒီလာ ဖျူအန်တေး

စပိန် အသင်းဟာ နည်းပြ အန်နရီကေးနဲ့ လမ်းခွဲပြီး နောက်ပိုင်း နာမည်ကြီး နည်းပြတွေကို မရွေးချယ်တော့ဘဲ သိပ်ပြီး လူသိမများလှတဲ့ လူးဝစ် ဒီလာဖျူအန်တေးကို ရွေးချယ် တာဝန်ပေးခဲ့ပါတယ်။ ၂၀၁၃ ခုနှစ်ကတည်းက စပိန် လူငယ် အသင်းတွေမှာ ပါဝင် ပတ်သက်ခဲ့တဲ့ ဒီလာ ဖျူအန်တေးဟာ လက်ရှိ စီနီယာ အသင်းက ကစားသမား တော်တော်များများရဲ့ အရည်အချင်းကို ပျိုးထောင်ပေးခဲ့သူ ဖြစ်ပါတယ်။ သူဟာ ကစားသမားတွေကို ကောင်းကောင်း ကိုင်တွယ်နိုင်သလို လိုအပ်ရင် လိုအပ်သလို ကစားကွက် ပြောင်းလဲနိုင်တဲ့ ဗျူဟာမြောက် နည်းပြ တစ်ဦးလည်း ဖြစ်ပါတယ်။ ဒါဟာ ကမ္ဘာ့ဖလားလို အကြီးမားဆုံး စင်မြင့်ထက်မှာ သူ့ရဲ့ ပထမဆုံး အတွေ့အကြုံ ဖြစ်လာမှာ ဖြစ်ပေမယ့် နိုင်ငံလက်ရွေးစင်အသင်းနဲ့ ပြသထားတဲ့ သူ့ရဲ့ မှတ်တမ်းတွေ ကတော့ အင်မတန် အထင်ကြီးစရာ ကောင်းလှပါတယ်။

 

စပိန် အသင်းရဲ့ ကစားကွက်နဲ့ စတိုင်

• နှစ်သက်တဲ့ ကစားကွက် – ၄-၂-၃-၁
• ကစားဟန် – ပေါင်းစပ် ကစားဟန် 
• အားသာချက် – နည်းစနစ်ပိုင်း အလွန်မြင့်မားခြင်း၊ ထိရောက်တဲ့ ဖိအားပေးမှု၊ တောင်ပံများ ထိုးဖောက်မှု ပြင်းထန်ခြင်း၊ နေရာစုံ ဟန်ချက်ညီခြင်း
• အားနည်းချက်: စိတ်လိုက်မာန်ပါ ခံစစ် ကစားတတ်ခြင်း၊ ပြင်းထန်သော ဖိအားပေးမှုကြောင့် ရာသီဥတုပူပြင်းပါက ရုန်းကန်ရနိုင်ခြင်း၊ ပင်နယ်တီ အဆုံးအဖြတ်

စပိန် အသင်းဟာ တခြားနိုင်ငံအသင်းတွေ မလုပ်နိုင်တဲ့ ပွဲကို အလုံးစုံ လွှမ်းမိုးချုပ်ကိုင်နိုင်စွမ်း ရှိပေမယ့် ဘောလုံး ပေးပို့ရုံသက်သက်ပဲ ကစားတဲ့ အသင်းတော့ မဟုတ်ပါဘူး။ သူတို့ဟာ အသင်းလိုက် စည်းချက်ညီညီနဲ့ တိုက်ရိုက်ဆင်တဲ့ တိုက်စစ်ကို မြန်မြန်ဆန်ဆန် ဖော်ဆောင်နိုင်ပြီး၊ အသင်းမှာ ရှိတဲ့ ကမ္ဘာ့အဆင့် ကြယ်ပွင့်တွေ ကလည်း မှော်ဆန်တဲ့ ကစားကွက်တွေကို ဖန်တီးပေးနိုင်ကြပါတယ်။

လူတွေရဲ့ အာရုံစိုက်မှုက လာမင်း ယာမယ် အပေါ်မှာပဲ ရှိနေတတ်ပေမယ့် အသင်းမှာ ခြေစွမ်းပြနိုင်တဲ့ အရည်အသွေးမြင့် ကစားသမားတွေ အများကြီး ရှိပါသေးတယ်။ ဒါ့အပြင် အခု စပိန် အသင်းမှာ ၂၀၀၈ ခုနှစ် ယူရိုချန်ပီယံ ဖြစ်ကတည်းက ရှိခဲ့တဲ့ ဇွဲနပဲကြီးမှုနဲ့ ကြံ့ခိုင်မှုပိုင်းတွေလည်း ပေါင်းစပ် ပါဝင်နေပါတယ်။

 

စောင့်ကြည့်ရမယ့် ကစားသမားများ

အဓိက အဆုံးအဖြတ်ပေးနိုင်သူ – လာမင်း ယာမယ်

ကမ္ဘာ့အဆင့် ပါရမီရှင်လေး ယာမယ် အနေနဲ့ ၂၀၂၅-၂၆ ကလပ် ရာသီ အကုန်မှာ ရရှိခဲ့တဲ့ ပေါင်နောက်ကြော ဒဏ်ရာ ကနေ အမြန်ဆုံး သက်သာလာဖို့ ကမ္ဘာ့ဘောလုံးပရိသတ်တွေက မျှော်လင့်နေကြပါတယ်။ ဒီဒဏ်ရာကြောင့် သူဟာ ကိပ်ဗာဒီနဲ့ ဆော်ဒီအာရေဗျ တို့နဲ့ ပွဲစဉ်တွေကို လွဲချော်ဖို့ ရှိနေပါတယ်။ အကယ်၍ သူ ပြန်ကောင်းလာရင်တော့ ၁၉၈၆ က မာရာဒိုနာ၊ ၂၀၁၈ က အမ်ဘာပေး ဒါမှမဟုတ် ၂၀၂၂ က မက်ဆီ တို့လိုပဲ ကမ္ဘာ့ဖလား ပြိုင်ပွဲကြီး တစ်ခုလုံးကို လွှမ်းမိုးသွားနိုင်စွမ်း ရှိပါတယ်။

စောင့်ကြည့်ရမယ့် လူငယ် ကြယ်ပွင့် – ယရယ်မီ ပီနို

စပိန် အသင်း လူစာရင်းထဲမှာ လူမသိတဲ့သူ သိပ်မရှိပေမယ့် ယရယ်မီ ပီနို ကတော့ ပရိသတ်တွေ သိပ်မမြင်ဖူးသေးတဲ့ ကစားသမား ဖြစ်ပါလိမ့်မယ်။ ခရစ္စတယ်ပဲလေ့စ်နဲ့ အတူ ပရီးမီးယားလိဂ်ရဲ့ ပထမဆုံးရာသီမှာ ခြေစွမ်းပြခဲ့တဲ့ ဒီအပြေးမြန်တဲ့ တောင်ပံ ကစားသမားလေးဟာ ကွင်းထဲ ဆင်းပြီး ပြိုင်ဘက်ခံစစ်ကို ဒုက္ခပေးဖို့ အဆင်သင့် ဖြစ်နေပါတယ်။ သူက အဝေးကန်ချက်တွေ သွင်းယူရတာ ကိုလည်း သဘောကျသူ ဖြစ်ပါတယ်။

 

စပိန်ရဲ့ ခန့်မှန်းလူစာရင်း 

စပိန် အသင်းရဲ့ လူစာရင်းဟာ ယူရို ၂၀၂၄ တုန်းကနဲ့ စာရင် အပြောင်းအလဲ အတော်များများ ရှိလာမှာ ဖြစ်ပေမယ့် နည်းပြ ဒီလာဖျူအန်တေးရဲ့ စနစ်တကျ ကစားကွက်ကြောင့် ကစားသမားတွေ ပြောင်းလဲသွားရင်တောင် တူညီတဲ့ ခြေစွမ်းမျိုးကိုပဲ မြင်တွေ့ရဖို့ ရှိပါတယ်။ ပြိုင်ပွဲမစခင် နည်းပြ အတွက် အကြီးမားဆုံး ဆုံးဖြတ်ချက် ကတော့ ဂိုးသမား နေရာနဲ့ ယာမယ်ရဲ့ တစ်ဖက်ခြမ်း တောင်ပံမှာ ဘယ်သူ့ကို ထားမလဲဆိုတာပါပဲ။ ဒါ့အပြင် တခြားနေရာတွေက ဒဏ်ရာ ပြဿနာတွေကြောင့်လည်း အပြောင်းအလဲတွေ လုပ်ရဖို့ ရှိနေပါတယ်။

ယာမယ် ကတော့ ဒဏ်ရာကြောင့် အုပ်စု အစောပိုင်း တစ်ပွဲ သို့မဟုတ် နှစ်ပွဲလောက် လွဲချော်နိုင်လို့ ဖာရန်း တောရက်စ်က အစားဝင် ကစားဖို့ ရှိပြီး၊ ညာခြေဖနောင့်ရိုး ကျိုးသွားတဲ့ ဖာမင်း လိုပက်ဇ်ရဲ့ နေရာ မှာတော့ ဘာစီလိုနာ အသင်းဖော် ဒန်နီ အော်လမိုက ကွင်းလယ် အဖျက် နေရာမှာ ကစားပါလိမ့်မယ်။

ရှေ့တန်း တိုက်စစ် မှာတော့ မီခဲလ် အိုယာဇာဘယ်က အဲလ်ဗာရို မိုရာတာရဲ့ နေရာကို အစားထိုးကာ ပွဲထွက်ခွင့် ရနေပြီဖြစ်ပြီး၊ နီကို ဝီလီယမ်စ် ကတော့ ဒဏ်ရာ ပြဿနာတွေကြောင့် မြောက်အမေရိကကို လိုက်ပါလာနိုင်ဖို့ မသေချာသေးပါဘူး။ အဲလက်စ် ဘေနာ ကတော့ ကစားဟန် ကွဲပြားပြီး သူပါဝင်လာရင် ကွင်းလယ်ကို ပိုပြီး လူအင်အား သုံးလာနိုင်ကာ တောင်ပံတွေ မှာတော့ ယာမယ်ရဲ့ ဖန်တီးမှု အပေါ် အများကြီး မှီခိုသွားဖို့ ရှိပါတယ်။

ဂိုးသမား နေရာ မှာတော့ နည်းပြက အူနိုင်း ဆီမွန် ကိုပဲ ဆက်လက် ယုံကြည်သွားဖို့ ရှိပြီး အာဆင်နယ် ဂိုးသမား ဒါးဗစ် ရာယာ ခြေစွမ်းပြနေပေမဲ့ ပြောင်းလဲဖို့ မရှိပါဘူး။ အာဆင်နယ် ကွင်းလယ်လူ နှစ်ဦး ဖြစ်တဲ့ မာတင် ဇူဘီမန်ဒီနဲ့ မီခဲလ် မာရင်နို တို့လည်း ကြံ့ခိုင်မှု ကောင်းမွန်ရင် လူစာရင်းမှာ ပါဝင်လာမှာ ဖြစ်ပါတယ်။

 

လက်ရှိခြေစွမ်း

စပိန် အသင်းရဲ့ လက်ရှိ ခြေစွမ်းက ၂၀၂၆ ကမ္ဘာ့ဖလား အတွက် အလားအလာ တော်တော်လေး ကောင်းနေပါတယ်။ ခြေစစ်ပွဲကို အကောင်းဆုံး ဖြတ်သန်းခဲ့ပြီးနောက် ဥရောပ ချန်ပီယံဟာ အခုနှစ်အစမှာ ဆားဘီးယားကို အပြတ်အသတ် နိုင်ခဲ့သလို၊ လူစာရင်း အပြောင်းအလဲ အများကြီး လုပ်ခဲ့တဲ့ အီဂျစ်နဲ့ ပွဲမှာတော့ အခွင့်အရေးတွေ လွဲချော်ပြီး သရေကျခဲ့ပါတယ်။

ကွင်းလယ်မှာ ရိုဒရီနဲ့ ပက်ဒရီတို့ အတွဲအဖက်က လာမယ့် နွေရာသီမှာ ပွဲကို စိတ်ကြိုက် လွှမ်းမိုးနိုင်စွမ်း ရှိနေပြီး၊ တိုက်စစ် မှာတော့ အိုယာဇာဘယ်ရဲ့ ခြေစွမ်း မှန်ကန်မှုကြောင့် ယာမယ် မဟုတ်ဘဲ ရီးရဲလ်ဆိုစီဒက် ကြယ်ပွင့် အိုယာဇာဘယ်က စပိန် အသင်း အတွက် အားထားရဆုံး ဂိုးသွင်းရှင် ဖြစ်လာနိုင်ပါတယ်။

 

အသင်း အပေါ် ခန့်မှန်းချက်များ

စပိန် အသင်းဟာ တစ်ချိန်တုန်းက ပွဲကြီး ပွဲကောင်းတွေမှာ အမြဲလိုလို စိတ်ပျက်စရာကောင်းအောင် ရှုံးနိမ့်တတ်တဲ့ အသင်း အဖြစ် အပြောခံခဲ့ရဖူးပေမဲ့ ယူရို ၂၀၀၈ နောက်ပိုင်း မှာတော့ အဲဒီအမြင်တွေ လုံးဝ ပြောင်းလဲသွားခဲ့ပါပြီ။ မကြာသေးခင်က ကမ္ဘာ့ဖလားတွေမှာ ရုန်းကန်ခဲ့ရပေမယ့် စပိန် အသင်းဟာ ပြီးခဲ့တဲ့ နှစ်ပေါင်း ၂၀ အတွင်း အမြဲတမ်း အောင်မြင်မှုတွေ ရနေတဲ့ အသင်း ဖြစ်တာကြောင့် နည်းပြ ဒီလာ ဖျူအန်တေး ကလည်း လာမယ့် နွေရာသီမှာ ချန်ပီယံ ဖြစ်ဖို့ ရေပန်းအစားဆုံး ဆိုတဲ့ ခေါင်းစဉ်ကို ဝမ်းမြောက်ဝမ်းသာ လက်ခံထားပါတယ်။

လက်ရှိ စနစ်အောက်က လာရိုဟာရဲ့ ကစားဟန်ကို ကြည့်ခြင်းအားဖြင့် သူတို့ရဲ့ အလားအလာ အပေါ် စိတ်လှုပ်ရှားမိမှာ သေချာပါတယ်။ ယူရို ၂၀၂၄ တုန်းကလို တခြား အသင်းတွေထက် အပြတ်အသတ် သာလွန်နေတဲ့ အသင်းမျိုးတော့ မဟုတ်နိုင်ပေမယ့် လာမယ့် နွေရာသီဟာ စပိန် နိုင်ငံ အတွက် နောက်ထပ် အောင်ပွဲခံရမယ့် ရွှေရောင်နေ့ရက်တွေ ဖြစ်လာဖို့ အကြောင်းပြချက်တွေ အများကြီး ရှိနေပါတယ်။

   

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်